AR GWAZ
Demat, mignonez fidel, setu me gwall nec'het
Demat, mignonez fidel, setu me gwall nec'het
Echu eo ma flijadur ha rentet glac'haret
Echu eo ma flijadur ha rentet glac'haret
N'em eus den d'am c'hoñsoliñ nemedoc'h a rafe
C'hwi am lako c'hoazh dispos hervez ho polontez
AR PLAC'H
Betek bremañ oa moien da zont d'ho koñsoliñ
Pa glevan o lavaret e renkomp kimiadiñ
Da Zoue ha d'ar Werc'hez en em rekomandan
Ken glac'haret on ha c'hwi o partial bremañ
AR GWAZ
Ma na deu den da zispenn hon holl promesoù
Em bo koñsolasion da vont er-maez ar vro
Gavin ket hir an amzer o tremen ma c'hoñje
Hag erfin d'oc'h eureujiñ, ma choman en buhez
AR PLAC'H
Biskoazh plac'h onest ebet n'en da enep d'he le
Demeus a greiz va c'halon em boa graet promese
Birviken na zislarin ar pezh am eus laret
Ken a vo ho mortuaj er gêr en em rentet
AR GWAZ
Skañvaat a ra ma spered ha fin zo d'am zourmant
Pa lavaret 'n em zerc'hel er memes santimant
Evit-me a rai ivez hed an eur diwezhañ
Ma ven lezet gant Doue da ren war ar bed-mañ
AR PLAC'H
War ar Skritur eo merket ar re a zo kastiet
Gant Doue war ar bed-mañ a vo rekompañset
Pa 'z imp dirak ar Barner da glevet hor setañs
Diouzh mad pe fall 'm omp graet e vo hon rekompañs
AR GWAZ
Ne oan nemet daouzek vloaz pa oa marv ma zad
Ha ma mamm ur miz goude, o gwashañ kalonad !
Ha bremañ pa 'z on savet da gaout va flijadur
E renkan dont d'ho kuitaat, o tristan avantur !
AR PLAC'H
Arabat eo en em glemm a volontez Doue
Me n'am boa nemet seizh vloaz pa oa marv ma re
En ur ober pemzek deiz ec'h int bet dioueret
Ma zad, ma mamm, ma daou vreur, div deus va c'hoarezed
AR GWAZ
An disterañ c'houlennan ma teut d'hen akordiñ
Ha mouchouer hoc'h-unan gant ho torn hen rei din
'Vit ma gavin anezhañ da sec'hiñ an daeloù
A ruilh deus ma daoulagad, o pellaat deus ar vro
Lakit ho torn em hini, ma mignonez fidel
Me lavar deoc'h marteze hed ar gloar eternel
Dalc'hit mat-sur d'ho komzoù, me vo fidel d'am re
Ha lakeomp hon fiziañs e madelezh Doue
Paroles2Chansons dispose d’un accord de licence de paroles de chansons avec la Société des Editeurs et Auteurs de Musique (SEAM)
