Marc'heg Bran a zo bet tizhet;
Rak e kad Kerloan emañ bet.
E kad Kerloan, e-tal ar mor,
Oe tizhet mab bihan Bran-Vor.
Daoust d'hor gounid oe kemeret,
Ha glas-alaouret oe kaset.
Ha glas-alaouret pa zeuas,
E-barzh un tour, eñ a oelas:
-Va c'herent a drid hag a you,
Ha me war va gwele: ah ! you !
Me garfe kaout ur c'han-nader
A zougfe d'am mamm ul lizher.-
Ar c'hannader pa oe kavet,
Ar marc'heg en deuz kemennet:
- Ur gwisk all, va den, a wiski,
Gwisk ur c'hlaskour boued a-zevri
Va bizoù 'gemeri ivez;
Va bizoù aour, en arouez;
Ha d'am bro dal' ma tigouezhi
D'am mamm itron e ziskouezi.
Ha mar deu va mamm d'am dasprenn
Kannader, arouezi e gwenn;
Ha, siwazh din, ma na zeu-hi;
Va faotr, e du ec'h arouezi.-
Pa zegouezhas e bro Leon,
E oa o koniañ an itron
E oa gant he zud, diouc'h an daol;
An delennourien en o roll.
- Noz vat deoc'h, itron an ti-mañ:
Setu bizoù aour ho mab Bran,
E vizoù koulz hag ul lizher:
Ret eo e lenn, e lenn e-berr.-
-Tavit, telennourien, ho son;
Glac'har vras a zo em c'halon;
Tavit, telenourien, buan,
Paket va mab, ne ouien mann !
Ra farder ul lestr din fenoz,
Ma treuzin ar mor antronoz !-
Antronoz, eveus e wele,
An aotrou Bran a c'houlenne:
- Gedour, gedour, din livirit,
Lestr-ebet o tont na welit ?
- Aotrou marc'heg, na welan-me
Nemet ar mor-bras hag an neñv.
Ann aotrou Bran a c'houlennas
Gant ar gedour, da greizteiz c'hoazh:
- Gedour, gedour, din livirit
Lestr ebet o tont na welit ?
- Aotrou marc'heg, na welan tra
Nemet mor-evned o nijal.-
An aotrou Bran a c'houlennas
Gant ar godour d'ar pardaez c'hoazh.
- Gedour, gedour, din livirit
Lestr ebet o tont na welit ?-
Ar godour-gaou, pa e glevas,
C'hoarzhin-droug outañ a reaz:
- Ul lestr a welan-me pell-pell
Hag eñ foetet gant an avel.
- Na pez' arouez ? livirit krenn !
Daoust eo hi du, daoust eo hi gwenn ?
- Aotrou marc'heg, 'vel ma welann,
Du eo, m'hen toue ruz-glaou-tan !-
Ar marc'heg kaezh, pa 'n deus klevet,
Na mui na ken 'n eus lavaret;
Distreiñ a reas e zremm c'hlas,
Ha gant an derzhienn a grenas .
Hag an itron a c'houlenne
Gant ar gêriz pa zouare:
- Petra nevez a zo amañ
Pa glevan ar c'hleier tinsañ ?-
Un den kozh en deus lavaret
D'an itron pa 'n deus he c'hlevet :
- Eur ar marc'heg paket oa amañ,
Mervel en deus graet en noz-mañ.-
Oa ket he gomz peurlavaret
An itron d'an tour zo pignet.
En ur redek, o ouelañ ken,
Dispak-kaer ganti he blev gwenn.
Ken a oa 'r gêriz souezhet,
Souezhet bras oc'h he gwelet,
Gwelet un itron zivroad
Oc'h ober kañv hed ar straed.
Ken a lavare peb unan:
-Piv eo houmañ, hag a-beban ?-
An itron baour a lavare
Da dreizher an tour, pa errue:
- Digor, digor, prim an nor din !
Ma mab ! ma mab ! ra e welin !-
Pa oa digoret an nor vras
War gorf he mab en em strinkas;
Hag e vriataat a reas,
Ha biken goude na savas.
E maez ar stourm, e Kerloan,
Zo un dervenn a-us ar c'hlan,
Un dervenn, e-lec'h m'argilas
Ar Saozon 'raok dremm Youen-Vras
War an dervenn, pa bar al loar,
Bep noz en em zastum adar,
Mor-adar du-bailh o fluennoù,
Ul lommig gwad war o fennoù.
Ganto, ur Vranez-gozh louet,
Ganti ur Vran yaouank kevret.
Skuizh o-daou ha gleb o eskell:
O tont glas-alaouret, ouc'h pell.
Hag an evned a gan ur c'han,
Ker kaer, ma tav ar mor ledan.
Ar c'han-se, 'n ur vouezh i e gan
Nemet ar Vranez hag ar Vran.
Hag ar Vran en deus lavaret:
- Kanet, evnedigoù, kanet.
Kanet, evnedigoù ar vro;
Pell eus a Vreizh n'oc'h ket marv .
Paroles2Chansons dispose d’un accord de licence de paroles de chansons avec la Société des Editeurs et Auteurs de Musique (SEAM)
