Lambkin wis as guid a mason
As ever hewed a stane
He built Lord Wearie's castle
And payment got nane
The lord said tae the lady
Ere he gaed abroad
"Beware, beware o Lambkin
That lives in yonder wood."
But the nursie wis as fause a limmer
As e'er hung on a tree
She's laid a plot wi Lambkin
Whan her lord wis ower the sea
She's laid a plot wi Lambkin
Whan the servants war awa
Lat him in, lat a little wee windae in
And brought him tae the haw
"Whaur's the lady o this hoose
That caws me Lambkin?"
"She's in her bower sewin
But we suin can bring her doun."
Lambkin's taen a lang knife
That's hung doun by his gare
And he haes gien yon bonnie bairn
A deep wound and a sair
Lambkin, he's rocked
And the fause nursie sang
And frae ilka bore o the cradle
The red bluid oot it ran
Oot spak the lady
At the tap o the stair
"Whit ails my bairn, nursie
That he's greetin sae sair?"
"Still the bairn, nursie
Still him wi the pap,"
"Oh, he'll no be still, lady
Nor for this, nor for that."
"Still the bairn, nursie
Still him wi the bell,"
"Oh, he'll no be still, lady
Til ye come doun yersel."
First step she steppit
She steppit on a stane
And the neisten step she steppit
She met wi Lambkin
"Oh, mercy, mercy, Lambkin
Hae mercy upon me
Ye hae taen my ain bairn
Nou lat me be."
"Oh, sall I kill her, nursie
Or sall I lat her be?"
"Aye, kill her, kill her, Lambkin
For she ne'er wis guid tae me."
"Scour the basin, nursie
Scour it fair and clean
For this lady's heart's bluid
For she comes o noble kin."
Twa, three months have passed and gaen
Lord Wearie he's come hame
Aye and dowie, dowie wis his hert
As first he's gaed in
"Whase bluid is this," he says
"That lies in my chaumer?"
"It is yer lady's hert's bluid
It's as clear as the lammer."
"And whase bluid is this," he says
"That lies in ma haw?"
"It is yer bairn's ain hert's bluid
It's clearest ava."
Bonnie, bonnie sang the lintie
Oot o a thorny break
And sair grat nursie
When burnin at the stake
Bonnie, bonnie sang the lintie
Oot o a thorny tree
And sair grat Lambkin
When he was condemned tae dee
Paroles2Chansons dispose d’un accord de licence de paroles de chansons avec la Société des Editeurs et Auteurs de Musique (SEAM)
