Per lei serres deis euses blaus
l’eternitat que varalhava
ambe l’odor aigra dei fedas
s’es arrestada que penjava
aicí ont siguèt vòstra espèra
sus lei nèblas jaunas dei vaus
e li remòrs deis autrei vidas.
Pèira freja dei matinadas
e finicion deis euses blaus
vent que se’n vai rota que vira
e que vos quita dins lo blau.
Aicí ont siguèt vòstra espèra
la montanha deis euses blaus
escota que tomban leis oras —
e quau ne prèga e quau ne plora —
au fons deis avenirs a paus.
Aicí ont moriguèt de joines
quin pas ausa porgir sei piadas
au rendètz-vos di mitralhadas
e dei matins de libertat ?
Au rendètz-vos dei mitralhadas
aviatz menat la libertat
l’odor dei fedas dins lei brotas
e vos leisseron sus la rota
dins un matin de libertat
ambe lei jorns ambe lei nuèchs
ambe lo cèu dins vostreis uèlhs.
Aicí ont moriguèt de joines
quin pas ausa porgir sei piadas
au desèrt de la libertat ?
La libertat que davalava
ambe l’odor aigra dei fedas
sus lei rotas de la montanha
vèrs la tèrra de nòstrei clèdas
mentre qu’amont onte se crosan
lo vespre ambe l’eternitat
s’enaurava la nusetat
d’una sola nivola ròsa.
Paroles2Chansons dispose d’un accord de licence de paroles de chansons avec la Société des Editeurs et Auteurs de Musique (SEAM)
