Ara que mon còr es pastat
e ma cara d’òme complida
tot drech au sorelh de la vida
que trais mon ombra au caladat,
m’enchaute pus… Cossí que vire,
onte que siegue l’an que ven,
a la fortuna soi consent
s’ai tota entre las mans ma vida…
Basta !… En mas ropas coma un rei
se cau ne manarai l’araire
o baile de tot lo terraire
sens me creire mai farai lei.
Pode pus èsser d’un estat
ni m’estacar en-luòc sus tèrra.
Òme caucigue la polvèra,
passe deliure en la ciutat.
Saique torne a Cesar çò siu :
me paga per far ma jornada ;
mas un còp que l’ai acabada
Cesar es pas pus res per ieu.
Mon diu dins mon còr embarrat
e ma cara d’òme complida
m’avance au sorelh de la vida
ambe mon ombra a mon costat
Paroles2Chansons dispose d’un accord de licence de paroles de chansons avec la Société des Editeurs et Auteurs de Musique (SEAM)
