Mé ki koné kisa li lé
Dawar son zorey là i sar bourdoné
Li dobout konm in rwa
Pars koté li-mem la lwa
Mé pa plis in prins Lislet
Pou d’bon kosa po nou ya fé
Li la pa pli gran Geoffroy
Mé sé li ki fé lo ver dann karé Barashwa
Mahé...
Pansé ton lépok la kapoté
Si sala ton plas défann atwé
Ni dres an tribinal
Pou jij ton piédestal
Si pou vréman lé mérité
Si la pa in foutan ton sélébrité
In jirman sibliminal
Pou nou majine mem pa kozé
In lisman boni-moni-mantal
Pou blanshi la vérité
In bann kolon la met atwé anler
Pou tout lo bon twé lété kapab
Na ti zanfan maron kreol i ve met atwé ater
Pou tout lorer twé té responsab
In rokonésans twé lé koupab
Mahé...
Riskab twé la ryin domandé
Mé kan mem la di oté
In milis pou shas limanité
Linjistis pou linité
Pou éfas in lidantité
Pou anjol la liberté
Kel mésaj dann in répiblik
Lesklavaj na toujour son piblik
In lintéré ékonomik
In pwa démotaktik
Desi in moun in vi
Kel linpak domin jordi
Pou in sinbol in lestati
Kel zimaj anndan lespri i res pri
Kan tout i vir lanver
Kan paradi i vyin lanfer
Kan lo sover i tonm bouro
Kan lo viktim i vyin éro
Kosa i korij i kas i les intak i pran in sans
Kisa kan la fine débat i apel pou rann lo santans
Là i fo i dépas tout kontwar
Nou di pa selman pou nout zanset
Pou lé blan oubyin lé nwar
Nou ve lé jis nou ve lé onet
In prosé pou nout listwar
In respé pou fé plas net
Mahé...
Konbyin konm twé na ankor oté
La met anler san tro fouyé
Kel lorizon nou ve agardé
Pou bann désider jordi ek nou osi
Domin fler oubyin galé
Wi Mahé mé non
Okilé pou maron
Wi Mahé mé non
Tir les sa pou kosa don
Sirtou la fine tan pou fé konet
Osi sak jordi i tonm an défet
Kel gran viktwar pou in pep
Kan tout son pasé li aksep
Wi Mahé mé non
Sa-r pa tri-patrimwane pou toulbon
Wi Mahé mé non
Alon dépas tousala don
Paroles2Chansons dispose d’un accord de licence de paroles de chansons avec la Société des Editeurs et Auteurs de Musique (SEAM)
