Cependant que Magny suit son grand Avanson
Pa,jas son Cardinal, et moy le mien encore,
Et que l’espoir flatteur, qui nos beaux ans devore,
Appastre nos desirs d’un friand hamesson,
Tu courtises les Roys, et d’un plus heureux son
Chantant l’heur de Henry, qui son siecle decore,
Tu t’honores toymesme, et celuy qui honore
L’honneur que tu luy fais de ta docte chanson.
Las, et nous ce pendant nous consumons nostre age
Sur le bord incogneu d’un estrange rivage,
Ou le malheur nous fait ces tristes vers chanter
Comme on void quelquefois, quand la mort les appelle,
Arrangez flanc à flanc parmy l’herbe nouvelle,
Bien loing sur un estang trois cygnes lamenter
